Comhghairdeas á dhéanamh ag an Aire Humphreys le foireann www.irishgenealogy.ie as an duais a bronnadh orthu ag Gradaim Ríomhsheirbhísí an Rialtais as Cur Chun Cinn na hÉireann Thar Lear
- Sonraí
- Foilsithe ar Dé Céadaoin, 31 Bea 2017 15:00
Tá comhghairdeas déanta ag an Aire Cultúir, Oidhreachta agus Gaeltachta, Heather Humphreys TD, leis an bhfoireann ina Roinn a dhéanann maoirsiú ar an suíomh gréasáin ginealais www.irishgenealogy.ie tar éis dóibh an Duais a bhuachan as Cur Chun Cinn na hÉireann Thar Lear ag Gradaim Ríomhsheirbhísí an Rialtais.
Ag labhairt di inniu, dúirt an tAire Heather Humphreys TD:
"Is léiriú é an gradam seo ar an obair chrua a dhéanann foireann mo Roinne, atá i ndiaidh suíomh gréasáin riachtanach a dhéanamh de www.irishgenealogy.ie do dhuine ar bith atá ag iarraidh taighde a dhéanamh ar a shinsearacht nó a sinsearacht Éireannach. Ón uair a cuireadh íomhánna an Chláir Shibhialta Stairiúil le www.irishgenealogy.ie i mí Mheán Fómhair 2016, tá níos mó ná leath mhilliún duine tar éis cuairt a thabhairt ar an suíomh gréasáin, agus bhí beagnach dhá thrian díobh sin lasmuigh d'Éirinn.
“Ba mhaith liom comhghairdeas a dhéanamh le foireann mo Roinne, lena n-áirítear an Chartlann Náisiúnta, as a gcuid oibre leis an rath seo a bhaint amach don suíomh gréasáin seo. Is mian liom freisin foireann na Príomh-Oifige Clárúcháin agus na Roinne Coimirce Sóisialaí a mholadh as a gcuid oibre chun na Cláir Shibhialta Stairiúla a chur ar fáil do mo Roinn lena gcur ar líne. Is sampla den scoth é seo den bhealach inar féidir torthaí an-dearfacha a bhaint amach do bhaill den phobal le comhoibriú tras-Rannach.”